چائے والا

 وقت کے تو جانو پر لگ گئے ہیں  ۔ ٹائم کا تو پتہ ہی نہیں چلتا ۔ دنیا بھی تو سمٹ کر رہ گئی ہے ۔ بچے بکھر گئے کچھ پڑھائیوں کے سلسلے میں اور کچھ نوکریوں کے سلسلے میں ۔ ماں باپ بچوں کے  چکر میں مسافر بن کر رہ گئے ۔ ایک قدم لندن تو دوسرا امریکہ ۔ 

ہمارا بھی کچھ یہی حال ہے ۔ پاکستان سے نکلے تو زمانہ  گزر گیا۔ کراچی بھی بھولا بسرا دھندلا سا ہو کر رہ گیا ہے ۔ ہم نے بھی حالات سے سمجھوتا کر لیا۔ اب تو ٹورنٹو کو ہی وطن سمجھ کر اسی سے دل لگا لیا ہے ۔ بچے انگلینڈ میں ہیں ہم کینیڈا میں ۔ سال میں ایک دو چکر لندن کا لگا آ تے ہیں ۔ 

اپریل کی چھ تاریخ کو ہماری بیٹی نے اپنے بیٹے کی شادی کی تقریب رکھی ہے ۔ ہمیں اپنا رخت سفر باندھنا ہے ۔ لندن جانے کی تیاری کرنی ہے۔ 

بدھ کے روز ہم والمارٹ میں گروسری کر رہے تھے ۔ ریحانہ مل گئ ادھر ادھر کی باتیں ہو نے لگیں ۔ ہم نے بتایا ہماری جمہ کی فلائیٹ ہے دعاؤں میں یاد رکھنا ۔ وہ پوچھنے لگی کہ کیا پاکستان جا رہی ہیں ۔

 ہم نے کہا کہ پاکستان تو اماں کے بعد پردیس سا ہو کر رہ گیا ۔ اب تو انگلینڈ ہی بچوں کی وجہ سے دیس بن گیا ہے ۔ وہیں کے چکر لگاتے رہتے ہیں ۔

ریحانہ بولی ۔ تمہارے تو مزے ہیں ایک قدم ٹورنٹو تو دوسرا لندن ۔ اب ا سے کیا سمجھا ئیں کہ بچے تو اپنے کاموں اور فیملی میں مصروف ہیں ۔ ہم نہ جائںں تو ان کی شکلیں دیکھنے سے ہی محروم ہو جائیں ۔

ٹورنٹو سے لندن سات گھنٹے سے زیادہ کا سفر ہے لندن  سے واپس آ تے وقت آ دھا گھنٹہ اور لگتا ہے ۔  پھر گھر سے گھر تک تو پورا دن ہی رکھ لو ۔ ہمت کر ہی لیتے ہیں بچوں سے ملنے کی لگن میں ۔ 

اب تو سفر کرنا بھی آ سان نہیں رہا ۔ کسی زمانے میں دو سوٹ کیس لے جانے کی سہولت تھی اب تو ایک سوٹ کیس لے جانے کے بھی اچھے خاصے پیسے دینے ہو تے ہیں 

 اتنا لمبا سفر ۔ چار دنوں کے لئے تو جانا نہیں ہوتا ۔ کچھ تو سامان لے کر جائیں گے ۔ پھر موسم کا بھی سوچنا ہوتا ہے ۔ کوٹ ۔ سوئٹر ۔ آ نے جا نے کے لئے تھوڑ ے بہت کپڑے تو لے جانے ہوں گے ۔ 

وہاں دو چار لوگوں سے ملنا جلنا بھی ہو تا ہے ۔ پر ائر لائن والوں کو اس سے کیا لینا دینا ۔ ہم ہی کسی نہ کسی طرح دریا کو کوزے میں بند کر کے ایک سوٹ کیس لے کر سمندر پار کرنے چل پڑتے ہیں ۔  

خدا کا شکر ہے ہمت ہو ہی جاتی ہے ۔ بچوں کو دیکھ آ تے ہیں ۔ ان کو مل آتے ہیں دل خوش کر لیتے ہیں ۔ سات آ ٹھ گھنٹے کا جہاز کا سفر بھول جاتے ہیں ۔  یہ بھی بھول جاتے ہیں کہ ابھی واپسی کا سفر رہتا ہے ۔ 

تو ہم بھی بچوں کی خاطر مسافر ہی بن چکے ہیں ۔ سوٹ کیس لئے ایک قدم لندن تو دوسرا کینیڈا ۔ اپنے کو خوش قسمت سمجھتے ہیں کہ بچوں کو دیکھ آ ئے ۔

 خدا جانے کب تک جا سکیں گے ۔

سفر آ سان نہیں پر اولاد کی محبت کا پر لا بھاری ہے۔  

ہم لندن پہنچ چکے ہیں ۔ سفر اچھا گزرا ۔  بچوں کے ساتھ بیٹھے ہیں بڑا اچھا لگ رہا ہے ۔ وا پسی کا سفرکر نا ہے ۔ ابھی اس کا نہیں سوچ رہے ۔ 

ارے بھئ کل کی کل دیکھی جائے گی ۔ جو وقت ہنس کھیل کر گزر جائے اس کو تو انجوائے کرلیں ۔ کل کی فکر میں ۔

کیوں وقت اپنا برباد کر یں

ایک تو خدا جانے اس عمر میں بھی ذہن کہاں کہاں بھٹکتا رہتا ہے ۔ اس وقت کبھی کبھی کا گانا یاد آ گیا

ہم سے پہلے کتنے آ ہے 

کتنے آ کر چلے گئے 

میں پل دو پل کا قصہ ہوں

پل دو پل میری کہانی ہے

سچ ہم آ پنی ذات کی الجھنوں کو سلجھانے میں یہ بھول جاتے ہیں کہ 

ہم پل دو پل کا قصہ ہیں 

کل سب سے جدا ہو جائیں گے

گو آ ج تمہارا حصہ ہیں

زندگی کے سفر میں ۔ راستے میں جو بھی لمحے مسکراہٹ بکھیر دیں ان کی قدر کر لیں ۔ 

کل کس نے دیکھی ہے ۔  ابھی تو یہ گا نا گا نے کو جی کر رہا ہے

سہانا سفر اور یہ موسم حسین 

ہمیں ڈر ہے ہم کھو نہ جائیں کہیں 

سامنے" چائے والا " کا اسٹال نظر آ گیا اس کی " پنک چائے " ہمیں ا چھی لگتی ہے ۔ ہماری بیٹی کو اس کی

  " کڑک چائے '" پسند ہے ۔ ہم چائے والا کے سامنے والی بنچ پر بیٹھے چائے کے مزے لے رہے ہیں ۔ زندگی سچ میں بڑی حسین لگ رہی ہے ۔