نہ باتی نہ تیل

 

بہت دن گزر گئے شاہینہ نے ہمارے گھر کا رخ نہیں کیا ۔ ا ن کے بھی نخرے ہیں ۔ اب ان کو دعوت نامہ بھیجا جائے ۔ آ ج کل تو افرا تفری کا زمانہ پے ۔ بہت کچھ بدل چکا ہے ۔

 نہ وہ قدریں رہیں نہ وہ طور طریقے ۔ اب تو شادی بیاہ کے بلاوے بھی بس واجبی سے ہو کر رہ گئے ہیں ۔ اس انٹرنیٹ نے تو کایا ہی پلٹ کر رکھ دی ۔ کاغذ کا پرزہ دیکھنے کے لئے تو آ نکھیں ترستی ہیں ۔ کاغذ کا استعمال توہم جیسے لوگوں کی حد تک رہ گیا ہے۔ ہم بھی زمانے سے قدم ملا نے کے چکر میں انٹرنیٹ پر آ گئے ہیں ۔ کاغذ تو گویا شجر ممنوعہ بن کر رہ گیا ہے ۔ 

ہاں تو بات ہو رہی تھی شاہینہ کی ۔ بھئ وہ کیوں نواب زاد ی بن کر بیٹھ گئ ہیں۔ اس سے پہلے تو ہزار بار اکثر فون کے بغیر ہی آ ٹپکتی تھیں ۔ اب کیا ہو گیا کہ مزا ج ہی نہیں مل رہے ۔ ہاں جب پچھلی بار آ ئ تھی تو ہمارے منہ سے نکل گیا کہ تمہاری باتوں کے چکر میں میرا سارا کام پڑا رہ گیا ۔ شاید وہی اس نے دل پر لے لیا ۔ 

اب پرانے دوستوں میں بھی انسان سوچ سمجھ کر بولے تو پھر دوستی ہی کیا ۔ خیر ہم ہی چھوٹے بن جاتے ہیں ۔ کل اس کو فون کریں گے ۔ آ ج تو شام ہو گئی پھر سچ پوچھو تو آ ج طبیعت بھی کچھ بوجھل سی ہے۔ جانے کیوں اماں یاد آ رہی ہیں ۔ آ ج ان کی برسی کا دن بھی نہیں ۔

 

 کل بھائی بھابھی آ ئے تھے ۔ بچے بیس بال بلیو جیز کا گیم دیکھنے گئے ہوئے تھے بڑے زمانہ کے بعد ٹیم فائنل میں پہنچی ہے ۔ بڑا زور ہے۔ ہمیں اپنے زمانے کی کرکٹ ٹیم یاد آ گئی ۔ اس زمانے میں میچ کا کیا زور وشور ہو تا تھا ۔ اب تو ہماری کرکٹ ٹیم کا خدا ہی حافظ ہے ۔ ملک کے ساتھ ساتھ چل رہی ہے ۔ قدم سے قدم ملا کر ۔ بس ہر وقت اللّٰہ آ مین ہی لگا رہتا ہے ۔ لوگوں کا انٹرسٹ ختم ہو کر رہ گیا ہے ۔

 

تم جیتو یا ہارو ہمیں تم سے پیار ہے 

گا گا کر بھی تھک چکے ہیں ۔ 

ہاں تو ہم کہ رہے تھے کہ کل بھائی بھابھی آ ئے تھے گھر میں کوئی نہیں تھا ہم نے جی بھر کے اپنی باتیں کیں۔ ماضی ہمیشہ پر کشش لگتا ہے ۔ مقناطیس کی مانند اپنی طرف کھینچ لیتا ہے۔ لاکھ کوشش کرو پیچھا نہیں چھوڑتا۔ پچھلی باتیں یاد آ گئیں ۔ باتیں تو ختم ہو جاتی ہیں پر دل پر بوجھ ڈال جا تی ہیں ۔ موڈ واپس لانے میں وقت لگتا ہے۔ 

آ پ کسی کو گھر بلا ئیں تو گھر کے ساتھ ساتھ گھر وا لا بھی صحیح حالت میں ہو نا چاہیے لوگ ہنسنے والوں کی کمپنی پسند کرتے ہیں ۔ رونے والے تو تنہا ہی رہ جاتے ہیں ۔ بچے بھی دامن بچا تے ہیں ۔ 

ہم پھر کہیں سے کہیں نکل گئے ۔ ایک تو دماغ کے اندر خدا جانے کتنے ویڈیو کیمرے فٹ ہیں ۔ خدا جانے ہر وقت کتنی فلمیں چل رہی ہو تی ہیں آ یک ساتھ ۔ چین ہی نہیں لینے دیتی ۔ 

 ہم انشاللہ کل ہی شاہینہ کو فون کر یں گے۔ اس سے کہیں گے کہ بھئ۔

رات گئی بات گئی ۔ کیا دل پر بوجھ لئے بیٹھی ہو۔ آ ؤ مل کر چائے پیتے ہیں ۔ کچھ اپنی کہو کچھ ہماری سنو۔ ریحانہ اور شازیہ بھی آ نے کو کہ رہی تھیں ۔ کہ رہی تھیں تم نے بہت دنوں سے شاہینہ کو نہیں بلایا ۔ چلو کل بلاتے ہیں سب کو ۔

غنیمت ہیں کہ ہم صورت یہاں دو چار بیٹھے ہیں ۔ ان کی قدر کریں۔ خبر نہیں کون کب بچھڑ جانے یا پھر ہمارا ہی بوریا بستر گول ہو جائے ۔

 

نہ باتی نہ تیل

یہ دنیا چار دنوں کا کھیل 

ہنس کر گزارلیں 

کل کس نے دیکھی ہے